Նա ունի ատամնաբույժի մասնագիտություն և հաճույքով նկարում է միայն գեղեցիկը: Կարդացեք զրույցը և ծանոթացեք քաղաքի լավագույն լուսանկարիչներից մեկի՝ Տուշո Բարսեղյանի հետ:

-Պատմեք՝ ինչպես եք դարձել լուսանկարիչ:

-Մոտավորապես 10 տարի առաջ, երբ ընկերներիս հետ գնացել էի քաղաքից դուրս, վերցրի նրանցից մեկի տեսախցիկը և սկսեցի տարբեր բաներ լուսանկարել: Հենց այդ օրվանից լուսանկարչությունը կարծես մտավ «երակներիս մեջ»:

Հետագայում ինտերնետի և լուսանկարիչ ընկերներիս շնորհիվ տիրապետեցի ներկայիս մասնագիտությանը:

-Իսկ առաջին մասնագիտությա՞մբ….

-Ատամնաբույժ եմ (ժպտում է.-հեղ.)….զգացի, որ «իմը» չէ:

-Առաջին լուսանկարները՞….

-Չեն ստացվել. կամ ամբողջությամբ «վառված» էին, կամ սև, որտեղ ոչինչ չէր երևում:

-Նախկինում աշխատել եք ԷԼ Style ամսագրում, իսկ հիմա՞… ինչո՞վ եք զբաղվում:

-Համագործակցում եմ նորաձևության ոլորտի մարդկանց հետ, ունենում՝ տարբեր անհատական պատվերներ: Նկարում եմ այն, ինչն ինձ հաճելի է:

–Լուսանկարչությունն աշխատանք է թե՞ հոբբի:

-Հոբբի, որը դառնում է աշխատանք:

–Եթե ետ գնանք, չե՞ք ափսոսում, որ ատամնաբույժի լուրջ մասնագիտությունից անցել եք առանց որևէ կոնկրետ գրաֆիկի աշխատանքի:

-Իմ էությունը չի սիրում ինչ-որ ժամային գրաֆիկով կայուն աշխատանք: Եվ սա նույնպես պատճառ էր, որ այդպես ստացվեց: Ես գիշերվա մարդ եմ, սիրում եմ գիշերը աշխատել:

–Իսկ գիշերը լինո՞ւմ է լուսանկարել:

-Պատկերացրեք՝ այո:

–Ինչ եք կարծում, ցանկացած տեսախցիկով հնարավո՞ր է ստանալ լավ լուսանկար:

-Անգամ սմարտֆոնով: Պետք է լինել գրագետ, տվյալ տարածքում հասկանալ ճիշտ լույսը, ռակուրսը և  ամենակարևորը՝ ունենալ «լուսանկարչի աչք»:

–Լավ լուսանկար ստանալու համար ի՞նչ է պետք:

-Լավ տրամադրություն, տրամադրվածություն և ճիշտ լույս:

–Ի՞նչ եք սիրում լուսանկարել:

-Գեղեցիկը. այսինքն աղջիկներին և կանանց (ժպտում է.-հեղ.):

–Բնությունն էլ է գեղեցիկ….

-Դե, եթե բնության մեջ կա աղջիկ (ծիծաղում ենք.-հեղ.):

-Մինչև լուսանկարելը….

-Կարևոր է մարդու հետ շփվել, մի փոքր ճանաչել նրան՝ հասկանալու, թե ինչպիսին է նրա ճաշակը և ինչ ֆոտոներ է ուզում:

-Ձեր ֆեյսբուքյան էջում գտա փոքր ժամանակվա լուսանկար, որից երևում է՝ չեք սիրում լուսանկարվել: Իսկ հիմա՞:

-Նույնը, ճիշտ է նկարի մեջի պես չեմ լացում, բայց հիմա էլ ահավոր չեմ սիրում լուսանկարվել: Հազվադեպ, այն էլ միայն ընկերներիս հետ խնջույքների ժամանակ:

–Ցուցահանդես ունեցե՞լ եք:

-Անձնական՝ ոչ, բայց մասնակցել եմ Հայաստանում և Բելգիայում կայացած ցուցահանդեսներին:

-Ո՞վ է գեղեցիկ աղջիկը:

-Մոնիկա Բելուչին:

-Կա՞ մեկը, ում երազում եք լուսանկարել:

-Ոչ թե երազանք, այլ նպատակ երևի, օրինակ՝ Victoria’s Secret-ի մոդելներից Palvin Barbara-ին:

-Ինչպե՞ս կնկարագրեք Ձեզ:

-Պարզ և ընկերասեր:

-Առաջիկայում….

-Ուզում եմ մեկնել արտերկիր, մասնակցել դասընթացների, մաստեր-կլասսների, աշխատել նոր մարդկանց հետ, ստեղծել լավ պորտֆոլիո և վերադառնալ: